Рэкордны аб’ём цукру атрымалі на заводзе ў Жабінцы
Фота з архіва 26 студзеня, Брэст . На Жабінкаўскім цукровым заводзе завяршылі сезон перапрацоўкі цукровых буракоў, паведаміў генеральны дырэктар прадпрыемства Аляксандр Пазнанскі.
На заводзе перапрацавалі 1 млн 401 тыс. т цукровых буракоў. «Гэта рэкордны ўраджай і рэкордны па працягласці сезон перапрацоўкі за ўсю гісторыю Жабінкаўскага цукровага завода. Мы запусціліся 5 верасня, закончылі 25 студзеня. У канчатковым выніку атрымаецца каля 189,5 тыс. т цукру. Ніколі столькі не выраблялі», — звярнуў увагу Аляксандр Пазнанскі.
На жабінкаўскае прадпрыемства цукровыя буракі пастаўляюць гаспадаркі 13 раёнаў Брэсцкай вобласці і двух раёнаў Гродзенскай вобласці. Уся праца аграрыяў у сто разоў акупілася. «Буракі паказалі небывалую ўраджайнасць. Сярэдняя ўраджайнасць па Брэсцкай вобласці склала 645 ц/га, высокія паказчыкі па цукрыстасці. Ёсць чым ганарыцца», — сказаў кіраўнік цукровага завода.
Выраб цукру — даволі працаёмкі працэс. З палёў салодкія караняплоды трапляюць спачатку на буракапрыёмныя пункты, адтуль — ужо на перапрацоўку. Буракі мыюць, рэжуць, атрыманую стружку высалоджваюць. Затым праводзіцца ачыстка цукровабурачнага соку на станцыі дэфекасатурацыі, лішнюю ваду выпарваюць і атрымліваюць сіроп, з якога ўварваюць цукар. Фінішная стадыя — фасоўка. Пасля гэтага прадукцыя адпраўляецца на прылаўкі магазінаў.
«Забяспечваем харчовую бяспеку нашай краіны. На працягу васьмі месяцаў да новага сезона будзем прадаваць выраблены цукар. Арыенціровачна 40 працэнтаў застанецца ўнутры краіны, астатнія 60 працэнтаў будуць рэалізаваны на экспарт. Стратэгічныя партнёры — Расія, краіны Сярэдняй Азіі», — падагульніў Аляксандр Пазнанскі.
