«Расказваць і паказваць гэту вайну». Праекты БЕЛТА да 80-годдзя Перамогі прэзентаваны на Інфармсавеце СНД
19 чэрвеня, Мінск . Праекты інфармацыйнага агенцтва БЕЛТА да 80-годдзя Вялікай Перамогі прэзентаваны ў час пасяджэння Савета кіраўнікоў дзяржаўных інфармацыйных агенцтваў СНД (Інфармсавет СНД) у Санкт-Пецярбургу,
«У Беларусі ў час Вялікай Айчыннай вайны загінуў кожны трэці. Якой бы горкай ні была гістарычная праўда, яна вельмі важная. Важная тая работа, якая праводзіцца ў Беларусі, — яе вядуць сотні пошукавых атрадаў (і ў іх вельмі шмат моладзі), але перш за ўсё яе праводзяць органы пракуратуры і пошукавы батальён Узброеных Сіл у рамках крымінальнай справы аб генацыдзе беларускага народа. І яны высвечваюць страшную рэальнасць, — адзначыла гендырэктар БЕЛТА Ірына Акуловіч. — Задача ў нас, журналістаў, — расказваць і паказваць гэту вайну».
Ірына Акуловіч расказала пра кнігу «Воіны духу» — гэта сумесны праект БЕЛТА і БПЦ, які прадстаўляе цыкл з 12 гісторый свяшчэннікаў і манахаў, якія ў гады Вялікай Айчыннай абаранялі Радзіму на франтах і змагаліся з ворагам на акупіраваных тэрыторыях.
Яшчэ адна кніга БЕЛТА будзе прэзентавана праз два тыдні. Гэта праект «Цытадэлі мужнасці», які апавядае аб 42 населеных пунктах, якія асаліва вызначыліся ў час змаганняў з нацыстамі ў гады Вялікай Айчыннай вайны. 
Праект «Парад Пераможцаў: гісторыі і асобы» расказвае пра беларусаў, якія прымалі ўдзел у легендарным Парадзе Перамогі, што прайшоў у Маскве 24 чэрвеня 1945 года.
Праект «Гісторыя аднаго подзвігу» — гэта незвычайныя нарысы, у якіх праз дзіўныя артэфакты, асабістыя рэчы і прадметы (нават баявую тэхніку і карціны) пададзены падзеі, лёсы і гісторыі подзвігу сапраўдных герояў.
Фотавыстава «Лёсы, складзеныя ў трохкутнік» — сумесны патрыятычны праект БЕЛТА і Беларускага дзяржаўнага музея гісторыі Вялікай Айчыннай вайны. Выстава пабывала ва ўсіх рэгіёнах краіны, пачаўшы свой шлях з Брэсцкай крэпасці. Яна інтэрактыўная: разам з ёй працуе палявая пошта і ўніфармісты, можна адправіць па краіне ваеннае пісьмо-трохкутнік. 
Фотавыстава «Перамога ў памяці жыве» ўпершыню поўнамаштабна паказала, як святкавалі Дзень Перамогі ў БССР і суверэннай Беларусі з 1945 года і да нашых дзён.
Фотавыстава «Жанчына, вайна, Перамога» — гэта серыя ажылых ролікаў, заснаваных на фатаграфіях з фотахронікі БЕЛТА. 
Спецыяльны праект БЕЛТА «Прафесіі Перамогі» — пра адважных людзей самых розных прафесій — тых, хто, знаходзячыся на перадавой, у тыле або акупацыі, уносіў свой уклад ва ўсенародную барацьбу з фашызмам.
Праект БЕЛТА «Нішто не забыта» расказвае пра подзвіг і смутак беларускага народа, пра тыя памятныя мясціны Вялікай Айчыннай вайны, якія не заўсёды шырока вядомы, але дакладна вартыя таго, каб мы памяталі пра гэтыя старонкі гісторыі.
«Важна тое, што мы не заканчваем праекты пасля завяршэння майскіх свят, яны ўсе разлічаны да канца года. Але і ў наступным годзе мы прадоўжым сваю журналісцкую работу па асвятленні тэмы Перамогі, тэмы гераізму нашых народаў, якія адной вялікай сям’ёй набліжалі Вялікую Перамогу», — дапоўніла Ірына Акуловіч.
