Рабчынскі стаў лепшым іграком групавога этапу SEHA-лігі
Кірыл Рабчынскі. Фота SEHA 24 сакавіка, Мінск . Кірыл Рабчынскі стаў лепшым іграком групавога этапу SEHA-лігі,
У 10 праведзеных сустрэчах папярэдняй стадыі лідар атак гандбалістаў мінскага СКА стаў лепшым бамбардзірам турніру, закінуўшы 60 мячоў. Разам з Рабчынскім у сімвалічную зборную групавога этапу ўвайшлі яшчэ двое беларусаў — яго аднаклубнік Яўген Лабар і Вячаслаў Бохан з піцерскага «Зеніта». Акрамя іх у каманду ўключаны два прадстаўнікі лідара рэгулярнага сезона клуба «Мяшкоў Брэст» — славак Марцін Поціск і расіянін Аляксей Фокін, а таксама Антон Аксюкоў з «Чэхаўскіх мядзведзяў» і галкіпер «Зеніта» Іван Шароў.
Па выніках «рэгуляркі» прамыя пуцёўкі ў «Фінал чатырох» заваявалі «Мяшкоў Брэст» і «Зеніт». Да іх далучацца пераможцы чвэрцьфінальных баталій: «Машэка» (Магілёў) — СКА (Мінск), «Віктар» (Стаўрапаль) — «Чэхаўскія мядзведзі». Першыя сустрэчы адбудуцца 31 сакавіка ў Магілёве і Стаўрапалі, паядынкі ў адказ пройдуць 4 красавіка ў Чэхаве і 5 красавіка ў Мінску. Вырашальны этап цяперашняга сезона дывізіёна Усход адбудзецца 13-14 чэрвеня ў брэсцкім спарткомплексе «Вікторыя». Раней Брэст прымаў фінальныя баталіі SEHA-лігі ў 2017, 2019 і 2024 гадах.
У фінальным паядынку мінулага сезона «Зеніт» адолеў «Чэхаўскіх мядзведзяў» — 35:34, а ў гульні за бронзавыя ўзнагароды маскоўскі ЦСКА аказаўся мацнейшым за брастаўчан — 32:23.
