Пуцін: пазітыўнае ўздзеянне інтэграцыі Беларусі і РФ у поўнай меры адчуваецца ў жыцці грамадзян
Уладзімір Пуцін. Фота з архіва ТАСС 2 красавіка, Масква /Эдуард Півавар . Прэзідэнт Расіі Уладзімір Пуцін накіраваў тэлеграму ўдзельнікам урачыстых сходаў з нагоды Дня яднання народаў Беларусі і Расіі. Аб гэтым паведамілі ў прэс-службе Крамля.
У пасланні, у прыватнасці, гаворыцца: «Роўна 30 гадоў таму быў падпісаны Дагавор аб утварэнні Супольніцтва Беларусі і Расіі, які паклаў пачатак аб’яднальным працэсам паміж нашымі краінамі. За гэты перыяд узаемавыгадныя інтэграцыйныя сувязі атрымалі каласальнае развіццё, і іх пазітыўнае ўздзеянне ў поўнай меры адчуваецца ў жыцці нашых грамадзян. Расіяне і беларусы сёння карыстаюцца роўнымі правамі ў сферы аховы здароўя, адукацыі, сацыяльным і пенсійным забеспячэнні, свабодна выбіраюць месца жыхарства і работы на ўсёй прасторы ад Брэста да Уладзівастока».
Расійскі лідар канстатаваў, што ў Саюзнай дзяржаве наладжана эфектыўная каардынацыя намаганняў у сферах знешняй палітыкі, абароны і бяспекі, што, несумненна, мае першараднае значэнне ў цяперашняй няпростай міжнароднай абстаноўцы. Беларусь і Расія сумесна распрацоўваюць і рэалізуюць комплексныя меры, накіраваныя на ўмацаванне свайго фінансава-эканамічнага і навукова-тэхналагічнага суверэнітэту.
«Не будзе перабольшаннем сказаць, што Саюзная дзяржава стала лакаматывам інтэграцыйных працэсаў на еўразійскай прасторы і ў многім служыць арыенцірам для сумеснай работы ў рамках такіх шматбаковых структур, як АДКБ, ЕАЭС, СНД і ШАС. Упэўнены, што, грунтуючыся на дасягнутых выніках, мы прадоўжым планамерную сумесную работу па далейшым нарошчванні ўсяго комплексу саюзніцкіх сувязей і шматпланавага супрацоўніцтва паміж Расіяй і Беларуссю — на карысць нашых братэрскіх народаў», — падкрэсліў Уладзімір Пуцін.
