«Проста спяваць крута недастаткова». У Гродне праходзіць рэгіянальны адбор на конкурсы «Славянскага базару»
27 лістапада, Гродна . У Гродне праходзіць рэгіянальны адбор да міжнародных конкурсаў у рамках ХХХV Міжнароднага фестывалю мастацтваў «Славянскі базар у Віцебску»,
Кастынг сабраў больш за 40 выканаўцаў з розных куткоў Гродзенскай вобласці. Першымі на сцэну выходзілі дзеці. Так, з Воранава прыехаў Міхаіл Шоцік. «Я чакаю яшчэ свайго выступлення і буду выконваць песні «По волнам минут» і «Не бывае неба лепшага». Другая мне падабаецца больш, яна пра нашу прыгожую Беларусь у розныя поры года. Займаюся вакалам я два гады, цяпер мне дзевяць. Наогул, я заўсёды спяваў, мне гэта падабаецца. Канкурэнцыя тут вялікая, але я хачу паказаць сябе»,- расказаў хлопчык.
А 10-гадовая Дар’я Пацукевіч з Гродна, паводле яе слоў, паспрабуе пакарыць журы выкананнем сваёй любімай песні «Начинающий артист». «Яна мне вельмі падабаецца тым, што яна пазітыўная, вясёлая, крыху расказвае аб тым, што я баюся сцэны. Яна задае настрой, — адзначыла дзяўчынка. — З нараджэння ў мяне вельмі прыгожы голас. І я вельмі люблю спяваць. Вельмі падабаецца выступаць, люблю, калі зала глядзіць на мяне. Для перамогі важна прыгажосць голасу і ўменне трымацца».
Адточваючы выкананне песні «Земля в иллюминаторе», 8-гадовая Сафія Працко з Гродна прызнаецца, што вельмі хоча паспяхова прайсці адбор. «Я займаюся вакалам з трох з палавінай гадоў. І мне вельмі падабаецца, прыемна, калі заваёўваеш месцы ў конкурсах. Акрамя песні «Земля в иллюминаторе» я будуць сёння выконваць песню «Рэчанька», яна вельмі цікавая, і яе любяць на конкурсах», — сказала яна.
Дарэчы, рэгіянальныя адборы прайшлі ўжо ў Магілёўскай і Мінскай абласцях. Пасля Гродзенскага рэгіёна эстафету прымуць Брэсцкая (28 лістапада, Баранавіцкі ГДК), Гомельская (2 лютага, Гарадскі цэнтр культуры) і Віцебская (4 снежня, к/з «Віцебск») вобласці, а таксама Мінск (10 снежня, Мінскі гарадскі палац культуры).
Як адзначыла загадчыца аддзела міжнароднага супрацоўніцтва Цэнтра культуры «Віцебск» дырэкцыі Міжнароднага фестывалю мастацтваў «Славянскі базар у Віцебску» Святлана Аўдзеева, да юбілейнага фестывалю асаблівая цікавасць у канкурсантаў і павышаныя патрабаванні журы. «Наша мэта — знайсці ў рэгіёне таго адзінага чалавека, які зможа прадставіць нашу краіну на вакальных конкурсах. Вельмі парадавала, што вялікая колькасць прадстаўлена была школ як у Магілёўскай, так і ў Мінскай вобласці. Проста выключна таленавітыя дзеці ў нас ёсць, было з каго выбраць, выбіралі лепшых нават у спрэчках», — сказала Святлана Аўдзеева, дадаўшы, што ў гэтым годзе журы ў тым ліку пільную ўвагу звяртае і на паглыбленне выканаўцаў у матэрыял.
«Нашы пераможцы будуць канкурыраваць з пераможцамі такіх жа нацыянальных адбораў у многіх краінах. Гэта вельмі адказна, хвалююча і вельмі ганарова, — сказала Святлана Аўдзеева. — Таму мы глядзім, як дзеці перастройваюцца з адной кампазіцыі на іншую, як яны паводзяць сябе на сцэне, як гатовы размаўляць з публікай, наколькі яны харызматычныя і стрэсаўстойлівыя. Гэта нюансы, з якіх складаецца артыст. Таму што на «Славянскім базары» ўжо проста спяваць крута недастаткова. Трэба мець нешта іншае адметнае і валодаць чумавой энергетыкай, артыстызмам, стрэсаўстойлівасць таксама немалаважна. Мы шукаем такога».
У адборачным туры да дзіцячага музычнага конкурсу могуць удзельнічаць беларускія выканаўцы ва ўзросце ад 8 да 14 гадоў, якія маюць вопыт канцэртных выступленняў і ўжо заявілі пра сябе на міжнародных або рэспубліканскіх музычных конкурсах і фестывалях. У адборачным туры да конкурсу выканаўцаў эстраднай песні прымаюць удзел беларускія выканаўцы ва ўзросце ад 18 да 31 года з вопытам канцэртных выступленняў на музычных конкурсах і фестывалях.
Для ўдзелу ў конкурсных праслухоўваннях неабходна прадставіць па дзве кампазіцыі. Удзельнікам дзіцячага музычнага конкурсу — эстрадную песню кампазітара славянскай краіны на адной са славянскіх моў (не больш за тры мінуты) і эстрадную песню дзіцяча-юнацкай тэматыкі (не больш за тры мінуты). Удзельнікам конкурсу выканаўцаў эстраднай песні — эстрадную песню кампазітара славянскай краіны на адной са славянскіх моў і папулярную кампазіцыю на замежнай мове (сусветны хіт).
Па выніках рэгіянальных конкурсаў адбіраецца да пяці ўдзельнікаў ад кожнай вобласці і Мінска для ўдзелу ў другім этапе адборачных тураў.
