Пераможцаў радыёконкурсу «Маладыя таленты Беларусі» ўзнагародзілі ў Мінску
Фота Белтэлерадыёкампаніі 14 снежня, Мінск . Цырымонія ўзнагароджвання пераможцаў XIV Рэспубліканскага творчага радыёконкурсу «Маладыя таленты Беларусі» прайшла ў Рэспубліканскім Палацы культуры прафсаюзаў. Аб гэтым БЕЛТА паведамілі ў прэс-службе Белтэлерадыёкампаніі.
У гэтым сезоне на радыёконкурс паступіла 465 заявак, фіналістамі сталі 175 таленавітых хлопцаў і дзяўчат у 10 намінацыях. У гала-канцэрце прынялі ўдзел пераможцы творчага спаборніцтва, а лаўрэаты ў інструментальным жанры прадэманстравалі сваё майстэрства ў суправаджэнні Сімфанічнага аркестра Белтэлерадыёкампаніі.
Уладальнікамі Гран-пры XIV Рэспубліканскага творчага радыёконкурсу «Маладыя таленты Беларусі» сталі: у намінацыі «Інструментальная музыка. Салісты. Духавыя і ўдарныя інструменты» — Назар Мамацюк, саксафон (Мінск), у намінацыі «Інструментальная музыка. Салісты. Народныя інструменты» — Юлія Аляксейкава, цымбалы (Гомель), у намінацыі «Інструментальная музыка. Салісты. Фартэпіяна» — Яўгенія Басалыга, фартэпіяна (Мінск), у намінацыі «Інструментальная музыка. Ансамблі» — узорны ансамбль народнай песні «Святкі» (Мінск), у намінацыі «Спадчына. Салісты» — Караліна Васільева (Мінск), у намінацыі «Эстрадны вакал. Ансамблі» — вакальны ансамбль «Фермата» (Мінск), у намінацыі «Эстрадны вакал. Салісты» — Ульяна Цішчанка (Магілёў) і ў намінацыі «Кампазітарская творчасць» — Кацярына Гушча (Брэст).
Лаўрэатамі I, II і III ступеней сталі 96 салістаў і калектываў, спецыяльных дыпломаў удастоены 19 удзельнікаў. Поўны спіс імёнаў пераможцаў конкурсу размешчаны на афіцыйным сайце радыё «Культура».
Акрамя памятных прызоў, пераможцы атрымаюць унікальныя магчымасці: ратацыю ў эфіры самага інтэлігентнага радыё краіны — канала «Культура» і запрашэнне на ўдзел у здымках тэлевізійнага праекта «Маладыя таленты Беларусі».
Праект «Маладыя таленты Беларусі» праводзіцца з 2009 года. За ўвесь час у ім прынялі ўдзел ужо больш як 5 тыс. выканаўцаў і калектываў з усёй краіны. З 2013 года прызёры конкурсу рэгулярна становяцца стыпендыятамі спецыяльнага фонду Прэзідэнта Рэспублікі Беларусь па падтрымцы таленавітай моладзі.
