«Перамога зараджалася ўпачатку». Пра што хацелі сказаць у сваёй пастаноўцы навучэнцы каледжа ГрДУ імя Я.Купалы
23 чэрвеня, Гродна . Навучэнцы і педагогі Гуманітарнага каледжа ГрДУ імя Янкі Купалы ў Дзень усенароднай памяці ахвяр Вялікай Айчыннай вайны і генацыду беларускага народа прадставілі пастаноўку «Табе, салдат 41-га, ад праўнукаў Перамогі»,
Ужо на працягу больш як 10 гадоў прадстаўнікі ВНУ арганізоўваюць акцыю «Памяць», якая стала важнай традыцыяй у культурным жыцці горада. Сёлета цэнтральная тэма — 80-годдзе Вялікай Перамогі. Выкладчыкі і навучэнцы каледжа праз прызму мастацтва аднавілі атмасферу тых трагічных гадоў, аддаючы даніну павагі гераізму, мужнасці і стойкасці тых, хто змагаўся за свабоду ў гады Вялікай Айчыннай вайны.
Як адзначыла рэктар ГрДУ імя Янкі Купалы Ірына Кітурка, выбарам тэмы пастаноўкі бягучага года яе стваральнікі хацелі падкрэсліць, што перамога 9 мая 1945 года пачыналася 22 чэрвеня 1941-га: «І пачыналася яна на берагах Нёмана, на берагах Буга, на берагах Мухаўца. Пачыналася яна тымі гераічнымі бітвамі, якія ажыццяўлялі нашы пагранічнікі, нашы рэгулярныя часці, Брэсцкая крэпасць. Яна здзяйснялася тымі, хто не адступіў перад у шмат разоў пераўзыходзячымі сіламі праціўніка».
«Пакуль мы жывём, мы помнім. Ген Перамогі, ген пераможцаў жыве ў крыві беларускага народа. Вельмі хочацца, каб ген памяці застаўся ў нас назаўсёды», — дадала рэктар ВНУ.
У пастаноўцы бягучага года былі задзейнічаны больш за 150 чалавек. «Я ўдзельнічаю ў акцыі «Памяць» ужо трэці год, са свайго першага курса. Гэта вельмі цікавая і значная частка жыцця каледжа і майго, чакаю пастаноўку з нецярпеннем кожны год. Так я магу паспрабаваць пражыць тыя моманты, якія людзі пражывалі ў гады Вялікай Айчыннай вайны, гэта яшчэ раз нагадвае ўсім пра тое, як важна помніць падзеі тых гадоў», — падзялілася навучэнка каледжа Вікторыя Кізюкевіч.
Паводле слоў навучэнца першага курса каледжа Арцёма Бароўскага, які выканаў ролю салдата, падрыхтоўка была грунтоўнай. «Рыхтаваліся доўга, захапіліся працэсам, — падзяліўся малады чалавек. — Гэта акцыя прысвечана пачатку Вялікай Айчыннай вайны і тым людзям, якія ахвяравалі сваім жыццём, падарылі нам бесклапотнае дзяцінства. Лічу, што мы, маладое пакаленне, павінны помніць пра гэта і не дапусціць, каб на нашай зямлі зноў такое здарылася».
Традыцыйна акцыя «Памяць» праходзіць у ноч з 22 на 23 чэрвеня ў парку Жылібера, а менавіта каля Вечнага агню і помніка савецкім воінам і партызанам, якія загінулі ў гады Вялікай Айчыннай вайны. Праект рэалізаваны 13 тэатралізаванымі праграмамі: «Вайна ў Гродне» (2005), «Іх было 360…» (2006), «Вайна вачыма дзяцей» (2007), «У вайны не жаночае аблічча» (2008), «Калі б зямля ўмела гаварыць»(2009), «Агонь любві» (2011), «Дзённік маці» (2012), «Вольга» (2014), «Якія маладыя мы былі» (2015), «Мне здаецца часам…» (2021), «Момант ісціны» (2022), «Невядомаму салдату прысвячаецца» (2023). У мінулым годзе тэма акцыі была звязана з 80-годдзем з пачатку вызваленчай аперацыі «Баграціён». Характэрна, што на гэты раз назіраць за пастаноўкай можна было і ў рэжыме анлайн.
