Паставы — культурная сталіца Беларусі
Рэспубліканская акцыя «Культурная сталіца Беларусі» праводзіцца з 2010 года.
Мэта акцыі — папулярызацыя дасягненняў нацыянальнай культуры, прэзентацыя самабытнасці гарадоў і рэгіёнаў, іх турыстычнай прывабнасці.
Культурнай сталіцай Беларусі ў 2026-м з’яўляецца горад Паставы.
Гісторыя горада налічвае некалькі стагоддзяў.
1409 г. — першае дакументальнае згадванне. Да сярэдзіны XVIII ст. Паставы ўяўлялі сабой невялікае мястэчка. Здаўна мясцовасць славілася багатымі кірмашамі, якія доўжыліся да двух тыдняў.
У 1720-я гг. Паставы перайшлі ў валоданне роду Тызенгаўзаў.
XVIII ст. — у горадзе пабудаваны ўнікальны архітэктурны ансамбль рыначнай плошчы, палац, арганізавана мануфактурная вытворчасць.
Гісторыка-культурная спадчына Пастаўскага раёна
На тэрыторыі раёна знаходзяцца больш за 40 помнікаў гісторыі і культуры, уключаных у Дзяржаўны спіс гісторыка-культурных каштоўнасцей.
Вядомыя аб’екты Пастаўскага краю:
гістарычная забудова цэнтральнай плошчы горада Паставы (былая Рыначная плошча);
палац Тызенгаўзаў (XVIII-XIX стст.);
касцёл Святога Антонія Падуанскага (XIX-XX стст.);
храм Святога Мікалая Цудатворца (XIX ст.);
вадзяны млын (XIX ст.)*;
касцёл Святога Іаана Хрысціцеля ў аграгарадку Камаі (XVII ст.).
У раёне таксама размешчаны некалькі гістарычных паркаў, заказнікі і помнікі прыроды.
У 2006 г. Паставы сталі сталіцай Дня беларускага пісьменства.
Тут штогод праходзіць Міжнародны фестываль народнай музыкі «Звіняць цымбалы і гармонік».
*сёння ў будынку знаходзіцца Дом рамёстваў.
Крыніцы: Міністэрства культуры Беларусі, Пастаўскі райвыканкам.
