Прэзідэнт Азербайджана высока ацаніў тэхналагічны патэнцыял беларускага ВПК на выстаўцы ADEX-2026
Фота Дзяржкамваенпрама 30 верасня, Мінск . Прэзідэнт Азербайджана Ільхам Аліеў наведаў беларускі павільён на азербайджанскай міжнароднай абароннай выстаўцы ADEX-2026, якая праходзіць з 30 верасня па 2 кастрычніка ў Баку. Аб гэтым паведамілі БЕЛТА ў Дзяржкамваенпраме.
Прэзідэнта Азербайджанскай Рэспублікі сустрэў старшыня Дзяржкамваенпрама Дзмітрый Пантус, які азнаёміў з экспазіцыяй беларускага ваенна-прамысловага комплексу. Кіраўніку азербайджанскай дзяржавы былі прадстаўлены найноўшыя распрацоўкі айчынных прадпрыемстваў.
Ільхам Аліеў высока ацаніў тэхналагічны патэнцыял беларускай абароннай прамысловасці і адзначыў важнасць далейшага развіцця двухбаковага супрацоўніцтва ў ваенна-тэхнічнай сферы.
«Візіт прэзідэнта Азербайджана ў нацыянальны павільён Дзяржкамваенпрама пацвярджае высокі інтарэс да беларускай прадукцыі і ўмацоўвае пазіцыі нашай краіны на міжнародным рынку ўзбраенняў», — падкрэслілі ў Дзяржкамваенпраме.
Таксама на абароннай выстаўцы ADEX-2026 старшыня Дзяржкамваенпрама правёў перагаворы з начальнікам штаба Каралеўскіх сухапутных войскаў Саудаўскай Аравіі Фахадам бен Сауд аль-Джухані. Бакі абмеркавалі перспектыўныя напрамкі ваенна-тэхнічнага супрацоўніцтва і канкрэтныя захады па іх рэалізацыі. Дыялог стаў лагічным працягам дамоўленасцей, дасягнутых у час папярэдніх кантактаў на высокім узроўні.
На выстаўцы разгорнута маштабная экспазіцыя беларускага ваенна-прамысловага комплексу. У нацыянальным павільёне прадстаўлены перадавыя распрацоўкі прадпрыемстваў — ад гранатамётнага комплексу да сучасных сродкаў радыёэлектроннай барацьбы і беспілотных авіяцыйных комплексаў. Наведвальнікі і ўдзельнікі форуму могуць азнаёміцца амаль са 150 натурнымі ўзорамі і макетамі ўзбраення, ваеннай і спецыяльнай тэхнікі, а таксама прадукцыяй двайнога і грамадзянскага прызначэння. Многія з прадстаўленых вырабаў не маюць аналагаў у свеце і ўжо зарэкамендавалі сябе на міжнародным рынку.
«Нягледзячы на тое, што выстаўка толькі пачала сваю работу, нацыянальны павільён выклікае шчыры інтарэс у замежных дэлегацый, экспертаў і журналістаў», — падкрэслілі ў Дзяржкамваенпраме.
ADEX — буйнейшая спецыялізаваная выстаўка ў рэгіёне Паўднёвага Каўказа і Каспійскага басейна, якая аб’ядноўвае вядучых ігракоў сусветнай абароннай прамысловасці. Гэта выдатная магчымасць азнаёміцца з сучаснымі тэхналогіямі, найноўшымі распрацоўкамі ваеннай тэхнікі і ўзорамі ВПК, што прапануюцца для экспартных паставак на сусветны рынак узбраенняў.
