МЗС Беларусі пракаменціравала планы Латвіі па будаўніцтве АЭС
Фота з архіва 2 красавіка, Мінск . У Міністэрстве замежных спраў Беларусі ў адказе на пытанне пракаменціравалі планы Латвіі па будаўніцтве АЭС, у тым ліку, як заяўляецца, у супрацоўніцтве з Эстоніяй і Літвой,
«Лічу, тут відавочны чарговы прыклад, мякка кажучы, непаслядоўнай і недальнабачнай палітыкі нашых прыбалтыйскіх суседзяй. Мы ж добра помнім як зусім нядаўна, у 2009 годзе, быў спынены другі і апошні блок Ігналінскай АЭС у Літве — па рашэнні, прынятым каб дагадзіць ЕС і пад яго націскам. Акрамя таго, разліковы кошт работ па закрыцці станцыі перасягне 3 млрд еўра. Здаецца, яшчэ ўчора ўся Еўропа салідарна была гатова вывесці з эксплуатацыі атамныя электрастанцыі і не будаваць новых рэактараў. Разлічвалі пражыць на энергіі ветру і танным амерыканскім сланцавым газе. Але рэальнасць аказалася больш суровай», — адзначыў у каментарыі прэс-сакратар МЗС Руслан Варанкоў.
Ён канстатаваў, што энергіі ветру недастаткова для забеспячэння базавых патрэбнасцей, а за сланцавы газ амерыканцы недвухсэнсоўна прапанавалі Еўропе заключыць кабальнае гандлёвае пагадненне. «Ды і газ з-за акіяна аказаўся зусім не танным з улікам транспарціроўкі ў звадкаваным выглядзе праз акіян і рэгазіфікацыі», — заўважыў дыпламат.
Руслан Варанкоў таксама нагадаў, якую гібрыдную вайну разгарнуў Вільнюс супраць Беларусі ў сувязі з будаўніцтвам і эксплуатацыяй БелАЭС: «Сочыць за кожнай упаўшай цаглінай на будоўлі, кожным планавым адключэннем на Беларускай АЭС у Астраўцы. З самага пачатку заклікалі міжнародную супольнасць прымусіць Беларусь адмовіцца ад планаў будаўніцтва АЭС. Не давалі нам жыцця ў міжнародных арганізацыях, блакіравалі нас па ўсіх напрамках».
«Урад Літвы ў бліжэйшыя чатыры гады мае намер дабівацца таго, каб пытанне БелАЭС заставалася на палітычным парадку дня Еўрасаюза. Прысвоілі нашай станцыі статус пастаяннай пагрозы. Запалохалі сваё насельніцтва, пастаянна раздаюць ёд і прыдумваюць планы эвакуацыі. І на гэтым фоне, як бачым, у тых жа краінах Прыбалтыкі актыўна вядуцца размовы аб тым, што атамная энергетыка эканамічна мэтазгодна і экалагічна бяспечная, — звярнуў увагу Руслан Варанкоў. — А мы ж прапаноўвалі ім у энергазабеспячэнні свае паслугі, не адключалі іх ад БРЭЛЛ, прапаноўвалі сумесна пабудаваць АЭС у Беларусі, эксплуатаваць яе і карыстацца таннай электраэнергіяй. Але прыбалтыйскія палітыканы ўбачылі ў гэтым пагрозу для сваіх краін. Цяпер жа яны будуць пераконваць сваіх падаткаплацельшчыкаў у тым, што танней за мільярды еўра будаваць і абслугоўваць станцыі з малой магутнасцю ў сябе, мець праблемы са спажываннем усяго аб’ёму электраэнергіі, якая выпрацоўваецца».
Прэс-сакратар адзначыў, што кошт АЭС пры такім раскладзе не будзе нізкім, нават пры ўмове раздачы на прыбалтыйскія рэспублікі, бо там ужо даўно няма значных спажыўцоў у выглядзе сталеплавільных, ліцейных вытворчасцей або цэментных заводаў. «Інакш кажучы, гэтыя выдаткі у любым выпадку праз тарыфы, падаткі зноў лягуць на радавых грамадзян, маламаёмных і гэтак далей», — сказаў ён.
«У любым выпадку разлічваем, што латвійскі бок будзе строга выконваць міжнародна-прававыя патрабаванні, у тым ліку па Канвенцыі Эспа, якая прадугледжвае публічныя абмеркаванні патэнцыяльна небяспечных праектаў унутры краіны і ў сумежных краінах», — заявіў Руслан Варанкоў.
