МЗС Беларусі нагадала Польшчы і Літве, што пытанне адкрыцця граніцы не можа вырашацца імі аднаасобна
Фота з архіва 31 кастрычніка, Мінск . Не прэм’еру Польшчы і тым больш Літвы вырашаць, калі адновяць сваю работу пункты пропуску праз дзяржаўную граніцу. Аб гэтым заявіў прэс-сакратар Міністэрства замежных спраў Беларусі Руслан Варанкоў, каменціруючы заявы кіраўнікоў урадаў адпаведных краін аб планах адкрыцця пунктаў пропуску праз беларуска-польскую граніцу «Баброўнікі» і «Кузніца».
«Не прэм’еру Польшчы і тым больш Літвы вырашаць, калі адновяць сваю работу пункты пропуску праз дзяржаўную граніцу «Баброўнікі» і «Кузніца». Тым не менш мы прымаем да ведама іх заявы і лічым неабходным дакладна абазначыць нашу прынцыповую пазіцыю. Граніца — гэта складаная інжынерна-тэхнічная і арганізацыйная сістэма. Любыя змяненні ў рэжыме яе работы патрабуюць паўнацэннай двухбаковай падрыхтоўкі. Беларусь згодзіцца з адкрыццём са свайго боку граніцы тады і толькі тады, калі будзе цалкам гатова да гэтага інфраструктурна, кадрава і, што найбольш важна, у сферы бяспекі», — заявіў прадстаўнік МЗС.
Ён звярнуў увагу на адсутнасць паслядоўнасці ў дзеяннях заходніх суседзяў Беларусі: аб’яўленыя тэрміны пастаянна пераносяцца, а само прынцыповае рашэнне — пераглядаецца.
«У цэлым аднаўленне функцыянавання пунктаў пропуску не можа і не будзе рэгулявацца аднабаковымі рашэннямі. Гэтага ж падыходу мы будзем прытрымлівацца і ва ўзаемадзеянні з літоўскім бокам, які напярэдадні ўвёў абмежаванні на беларуска-літоўскай граніцы, — сказаў Руслан Варанкоў. — Аднаўленне работы таксама немагчыма без наладжвання прафесійнага дыялогу паміж кампетэнтнымі службамі. Мы чакаем ад польскага боку адказнага падыходу: дасягнутыя дамоўленасці павінны быць стабільнымі і надзейнымі».
«Грамадзяне і бізнес не могуць станавіцца заложнікамі сітуацый, калі рашэнні аб закрыцці граніцы прымаюцца па-за прававымі рамкамі і без папярэдняга паведамлення. Размова ідзе не толькі пра беларусаў, палякаў ці літоўцаў, але і таксама пра грамадзян іншых дзяржаў — членаў Еўрапейскага саюза, для якога беларуска-польскі і беларуска-літоўскі рубяжы з’яўляюцца ўсходняй граніцай», — падкрэсліў прэс-сакратар.
«Тут як ніколі падыходзіць сцвярджэнне міністра замежных спраў Польшчы спадара Радаслава Сікорскага: для танга патрэбны двое. Беларускі бок сваю партыю ўжо даўно і дакладна выконвае. Цяпер чакаем, калі ж суседзі, нарэшце, вывучаць сваю», — рэзюмаваў ён.
