Спартсмены «Мінска» сталі другімі ў розыгрышы Кубка чэмпіёнаў па пляжным футболе
Фота Мінспорту 14 чэрвеня, Мінск . Спартсмены «Мінска» занялі другое месца ў розыгрышы Кубка еўрапейскіх чэмпіёнаў па пляжным футболе,
У вырашальным паядынку турніру ў партугальскім Назары чэмпіёны Беларусі ўступілі швейцарскаму клубу BSC-54 з лікам 4:6. У канцы першага перыяду і на старце другой трэці швейцарцы тройчы запар паразілі вароты мінчан, а потым Мікіта Чайкоўскі, Гаўрыіл Гаўрылаў і Ігар Брыштэль усталявалі парытэт — 3:3. Затым галявая перастрэлка прадоўжылася: на другі гол Гаўрылава сапернікі адказалі трыма дакладнымі ўдарамі, і перад заключным перыядам беларусы ўступалі — 4:6. Гэты рэзультат не змяніўся і да фінальнай сірэны.
У паўфінале падапечныя Дзмітрыя Камзолава перамаглі італьянскую каманду «Ленерджы Піза» ў серыі пасляматчавых пенальці — 4:3 (гульнявы час — 1:1), у чвэрцьфінальным паядынку перамаглі яшчэ адзін італьянскі клуб «Віярэджа» з рэзультатам 4:1, а ў 1/8 фіналу перамалі ў авертайме венгерскі «Боніхад» — 5:4. На папярэднім этапе беларусы занялі першае месца ў групе H, перамогшы нямецкі «Біч Роялс» (4:3), фінскі «Хобі» (14:3) і французскі «Манпелье» (7:1).
У гульні за бронзу «Ленерджы Піза» выйграў у ізраільскага клуба «Кфар» з рэзультатам 9:6.
У папярэднім сезоне тагачасны чэмпіён Беларусі магілёўскі ЦАР заваяваў бронзавыя ўзнагароды Кубка еўрапейскіх чэмпіёнаў, перамогшы ў гульні за трэцяе месца іспанскую «Марбелью» ў серыі пасляматчавых пенальці. Пераможцамі сталі футбалісты італьянскай «Катаніі», якія перамаглі ў вырашальным паядынку «Кфар» з рэзультатам 6:1.
