Лукашэнка і Пуцін зверылі гадзіннікі адносна парадку дня ВДС. Што чакаць ад саюзнага саміту ў Маскве
Фота з архіва Прэзідэнты Беларусі і Расіі Аляксандр Лукашэнка і Уладзімір Пуцін увечары 19 лютага правялі тэлефонную размову, у час якой дадаткова абмеркавалі пытанні маючага адбыцца пасяджэння Вышэйшага дзяржсавета Саюзнай дзяржавы. Гэта важнейшае мерапрыемства ў гадавым саюзным календары. У пачатку тыдня адпаведныя пытанні Прэзідэнт Беларусі абмяркоўваў на сустрэчы з дзяржаўным сакратаром Саюзнай дзяржавы Сяргеем Глазьевым. Да гэтага падрыхтоўка да ВДС таксама абмяркоўвалася 8 лютага ў час яшчэ адной тэлефоннай размовы кіраўнікоў дзяржаў.
Нагадаем, што ВДС з’яўляецца вышэйшым органам Саюзнай дзяржавы. У яго склад уваходзяць прэзідэнты, кіраўнікі ўрадаў, кіраўнікі палат парламентаў Беларусі і РФ. Старшынёй Вышэйшага дзяржсавета з’яўляецца Прэзідэнт Беларусі Аляксандр Лукашэнка. Ён займае гэту пасаду з 2000 года.
Чарговае пасяджэнне ВДС плануецца правесці ў Маскве 26 лютага. У тэлефоннай размове прэзідэнты дадаткова абмеркавалі пытанні, якія плануецца разгледзець. «Аляксандр Лукашэнка і Уладзімір Пуцін зверылі гадзіннікі па парадку дня маючага адбыцца мерапрыемства і найбольш актуальных тэмах, якія неабходна абмеркаваць як у шырокім коле, так і тэт-а-тэт. У размове таксама былі закрануты некаторыя пытанні беларуска-расійскіх адносін», — падзяліліся падрабязнасцямі ў прэс-службе беларускага лідара.
Сярод асноўных пытанняў абмяркуюць асноўныя напрамкі рэалізацыі палажэнняў Дагавора аб стварэнні Саюзнай дзяржавы на 2024-2026 гады (тут ужо выканана каля палавіны), а таксама намецяць перспектывы па распрацоўцы новага аналагічнага дакумента на перыяд 2027-2029 гадоў.
Сустракаючыся 16 лютага з Сяргеем Глазьевым, Прэзідэнт Беларусі сказаў: «Мы сур’ёзна настроены працаваць з Расіяй настолькі, наколькі здольна на гэта Расія. Вы разумееце больш, чым хто-небудзь, што мы ў пэўных пытаннях вельмі далёка адышлі адзін ад аднаго. І ў эканоміцы. Ну, добра што ў палітыцы, дыпламатыі, жыццё нас прымусіла ў ваенна-прамысловым комплексе, у абароннай прасторы быць разам».
«Час паказаў, што сяброў у нас — раз, два і ўсё. І адзін без аднаго абысціся мы не можам. І дзякуй богу, што гэты час паставіў нас усіх на месца», — падкрэсліў беларускі лідар.
Што датычыцца парадку дня маючага адбыцца пасяджэння ВДС, Прэзідэнт у якасці станоўчага факта адзначыў, што ў апараце Саюзнай дзяржавы падрыхтавалі прымальныя сем пытанняў. Размова перш за ўсё пра колькасць. «Ну, слухайце, ну хто абмяркуе 27 пытанняў?» — заўважыў кіраўнік дзяржавы.
«У нас усё ўзгоднена, Аляксандр Рыгоравіч», — сказаў у сувязі з гэтым Сяргей Глазьеў.
Аляксандр Лукашэнка звярнуў увагу, што Беларусь і Расія ў многім залежаць адна ад адной, але саюзніцкія адносіны не перашкаджаюць ім выбудоўваць суверэнную палітыку. «У нас розуму хопіць, каб у гэтай сітуацыі зманціраваць сапраўдны саюз, які будзе непадзельны, і нікому не будзе дазволена адарваць кагосьці кудысьці. Тым больш Беларусь ад Расіі, — заявіў Прэзідэнт. — Час такі, калі нам трэба быць разам, бачыць свае інтарэсы, адстойваць іх. У нас ёсць усё для таго, каб гэтыя інтарэсы абараніць і адстаяць. Ну, дурасці таксама хапае. Але мы бачым гэту дурасць, яна нам не патрэбна, мы ад гэтага здольны адысці».
Пасля сустрэчы ў Прэзідэнта Беларусі Сяргей Глазьеў расказаў журналістам, што практычна ўсе пытанні, якія выносяцца на Вышэйшы дзяржсавет, узгоднены ўрадамі дзвюх краін — 2 лютага прайшоў Саўмін Саюзнай дзяржавы, на якім былі разгледжаны гэтыя пытанні. «На Вышэйшым дзяржсавеце трэба будзе атрымаць палітычныя зацвярджэнні і даць зялёнае святло на рэалізацыю гэтых праектаў», — адзначыў ён.
Акрамя ўжо абазначаных вышэй ключавых пытанняў, звязаных з асноўнымі напрамкамі рэалізацыі саюзнага дагавора, ёсць і іншыя. Прычым не менш важныя для грамадзян Беларусі і Расіі. Адно з іх — арганізацыя прыгарадных трансгранічных чыгуначных зносін. Яны будуць звязваць пагранічныя рэгіёны. Пакуль гэта Смаленская вобласць і Віцебская. Будзе рэалізаваны наступны праект: два электрапаязды будуць у штодзённым рэжыме курсіраваць паміж Смаленскам і Віцебскам і паміж Оршай і Смаленскам. Усе льготы, якія грамадзяне маюць па нацыянальных заканадаўствах, будуць захаваны. На Вышэйшым савеце будзе прыняты дэкрэт, які запусціць гэты механізм.
Таксама на палях Вышэйшага савета, магчыма, будзе падпісаны мемарандум аб збудаванні высакаскораснай магістралі Мінск — Масква. Праект прапрацоўваецца.
Бакі паспяхова рэалізуюць праекты ў сферы імпартазамяшчэння, навукова-тэхнічныя праграмы Саюзнай дзяржавы. На Вышэйшым дзяржсавеце будзе прадстаўлена справаздача аб іх рэалізацыі, а таксама прынята рашэнне аб адпрацоўцы напрамкаў развіцця на 2027-2029 гады. «Тут мы закладваем ідэі, звязаныя са стратэгій апераджальнага развіцця Саюзнай дзяржавы, абапіраючыся на інтэграцыю нашых навукова-тэхнічных, вытворчых патэнцыялаў, а таксама стварэнне ўсіх магчымых макраэканамічных умоў для паскарэння развіцця нашай агульнай эканамічнай прасторы», — сказаў дзяржсакратар.
Яшчэ адным пытаннем, якое вынесуць на абмеркаванне, стане стварэнне Камітэта Саюзнай дзяржавы па стандартызацыі і якасці.
У парадак дня ўключаны і шэраг пытанняў, якія рэгулярна разглядае Вышэйшы дзяржсавет. Яны звязаны з узаемадзеяннем міністэрстваў замежных спраў, міністэрстваў юстыцыі ў рэалізацыі агульных інтарэсаў дзвюх краін на сусветнай арэне.
