Лыжнік Свірыдзенка аб Паралімпіядзе: прывёз не тры залатыя ўзнагароды, ёсць над чым працаваць
Раман Свірыдзенка. Скрыншот відэа 18 сакавіка, Мінск . Беларускі лыжнік Раман Свірыдзенка падзяліўся эмоцыямі пасля вяртання з Італіі, дзе спартсмен стаў чэмпіёнам XIV зімовых Паралімпійскіх гульняў,
На Паралімпіядзе Свірыдзенка спаборнічаў у класах LW2-LW9 (стаячыя атлеты з пашкоджаннямі канечнасцей) і заваяваў золата ў спрынце і серабро ў індывідуальнай гонцы на 10 км класікай. Пасля перамогі 21-гадовага новапалачаніна на лыжным стадыёне ў Тэзера гучаў беларускі гімн, чаго на галоўных стартах чатырохгоддзя з-за абмежаванняў не адбывалася з 2021 года.
«Атрымаў класныя эмоцыі, быў вельмі рады стаць чэмпіёнам у першай жа гонцы на Паралімпіядзе. Забег, дзе я заняў другое месца, атрымаўся больш складаным, чым «залаты». Галоўнае, што ўсе старанні былі не дарэмна. Хочацца быць прыкладам для людзей з абмежаванымі магчымасцямі, — сказаў Свірыдзенка. — Канкурэнцыя ў Італіі была вельмі сур’ёзнай, усё ж такі гэта галоўны турнір цыкла, слабых сапернікаў тут не магло быць. Медалі адназначна дабавяць мне матывацыі. Калі я не тры залатыя ўзнагароды прывёз, значыць, ёсць над чым працаваць. Але цяпер хачу проста адпачыць, паколькі аднаўленне — таксама важная частка трэніровачнага працэсу».
Медалі Рамана сталі для нашай дэлегацыі адзінымі ў Італіі, раней у гэтым сезоне беларус перамагаў на этапе Кубка свету ў Германіі. Усяго ўдзел у зімовых Паралімпійскіх гульнях прынялі больш за 600 атлетаў з 55 краін, нашу каманду таксама прадставілі лыжніцы Лідзія Лобан, Валянціна Бірыла і Дар’я Фядзьковіч.
