Кіраўнікі МНС Беларусі, Расіі і Казахстана абмяркуюць у Нясвіжы развіццё сістэмы маніторынгу пажараў
22 верасня, Нясвіж . У Нясвіжы пад старшынствам беларускага боку праходзіць XIII пасяджэнне Сумеснай калегіі МНС Беларусі, Казахстана і Расіі,
Удзел у пасяджэнні прымаюць міністр па надзвычайных сітуацыях Беларусі Вадзім Сіняўскі, міністр Расійскай Федэрацыі па справах грамадзянскай абароны, надзвычайных сітуацыях і ліквідацыі наступстваў стыхійных бедстваў Аляксандр Куранкоў і міністр па надзвычайных сітуацыях Казахстана Мурат Муханаў.
У гэтым годзе на пасяджэнні бакі разгледзяць пытанні ўкаранення перадавых тэхналогій у вытворчасць пажарнай і аварыйна-выратавальнай тэхнікі, інавацыйных практык ліквідацыі надзвычайных сітуацый на электратранспарце, а таксама ўдасканалення механізмаў маніторынгу і прагназавання пажараў і правядзення выратавальных аперацый у горнай мясцовасці скальнага рэльефу.
У МНС Беларусі адзначылі, што за доўгія гады работы сумесная калегія стала пляцоўкай абмеркавання і прыняцця як стратэгічных, так і практычных рашэнняў, накіраваных на павышэнне ўзроўню бяспекі насельніцтва, аб’ектаў эканомікі і крытычнай інфраструктуры ад шырокага спектра сучасных крызісаў і пагроз. Увага кіраўнікоў выратавальных ведамстваў акцэнтуецца не толькі на трохбаковым парадку дня, але і на пашырэнні сумесных інтарэсаў у рамках СНД, АДКБ, ЕАЭС і іншых міжнародных арганізацый.
Калегіяльны орган выратавальных ведамстваў Беларусі, Казахстана і Расіі заснаваны для каардынацыі сумеснай дзейнасці ў галіне аховы насельніцтва і тэрыторый ад надзвычайных сітуацый. Пасяджэнні калегіі праводзяцца штогод. 
Фота Сяргея Шэлега
