Які ўраджай кукурузы і сіласу плануюць атрымаць у гэтым сезоне, расказалі ў Мінсельгасхарчы
Фота з архіва 31 мая, Мінск . На які ўраджай зерня кукурузы і сіласу разлічваюць у гэтым годзе аграрыі, у эфіры тэлеканала СТБ расказаў начальнік галоўнага ўпраўлення раслінаводства Міністэрства сельскай гаспадаркі і харчавання Мікалай Лешык, .
«Калі ўлічыць, што пасевы кукурузы займаюць практычна 25 працэнтаў ад усіх пасяўных плошчаў, то можна сказаць, што гэта культура стратэгічная. Апошнія ўжо, напэўна, пяць гадоў больш-менш стабілізаваліся пасяўныя плошчы на ўзроўні 1,3 млн га ўсяго па рэспубліцы. Але ў разрэзе самой кукурузы ідзе тэндэнцыя на павелічэнне плошчы пад уборку для зерня і крыху зніжэнне на кармавыя мэты. У сувязі з тым, што ўраджайнасць расце, аб’ёмы кармоў нарыхтоўваюцца з меншых плошчаў, жывёлагадоўля забяспечваецца кармамі, ёсць магчымасць большыя плошчы адводзіць пад уборку на зерне», — расказаў Мікалай Лешык.
Кукуруза пасеяна своечасова, унесены стартавыя дозы ўгнаенняў. «На першых тэрмінах пасеваў праведзена ўжо апрацоўка ад пустазелля, што гарантуе атрыманне запланаванага ўраджаю», — падкрэсліў ён.
Наперадзе яшчэ нямала работы — завяршэнне праполак, правядзенне падкормлівання. Мінеральныя ўгнаенні для гэтых мэт назапашваюцца. «Задача пастаўлена атрымаць каля 3 млн у бункернай вазе зерня кукурузы і прыкладна 20 млн т нарыхтаваць сіласу», – дадаў ён.
У Беларусі ёсць свае магчымасці для вытворчасці насення гэтай культуры. «У нас ёсць для вытворчасці насення гібрыдаў кукурузы два вялікія кукурузакалібровачныя заводы і адзін невялікі на базе фермерскай гаспадаркі. У цэлым яны могуць паставіць да 30 тыс.т насення кукурузы — гэта практычна 70 працэнтаў ад патрэбнасці, — адзначыў Мікалай Лешык. — Момант стрымліваючы, што ва ўмовах рэспублікі праблематычна атрымаць якаснае насенне гібрыдаў позніх груп спеласці. І ёсць моманты недастатковасці бацькоўскіх ліній для вытворчасці насення гібрыдаў з ультрараннімі тэрмінамі выспявання для вытворчасці паўнацэннага зерня, у першую чаргу ва ўмовах Віцебскай і Магілёўскай абласцей».
Структура на палях па селекцыі, адзначыў Мікалай Лешык, выглядае наступным чынам: крыху больш за 50 працэнтаў насення айчыннай вытворчасці і ў межах 10-15 працэнтаў па асноўных селекцыянерах — Расійская Федэрацыя, Украіна, Еўропа.
Вырошчваюць у Беларусі і салодкую кукурузу. «У гэтым годзе запланавана каля 150 га. Але, у асноўным, гэта вырошчваюць нашы кансервавыя заводы для вытворчасці кукурузы ў слоіках і невялікія плошчы ў фермерскіх гаспадарак, якія вырошчваюць для продажу ў свежым выглядзе насельніцтву на рынках», — растлумачыў ён.
