Патрыярх Кірыл узначаліў Боскую літургію ў Свята-Уваскрасенскім саборы Брэста
Патрыярх Маскоўскі і ўсяе Русі Кірыл 21 чэрвеня, Брэст . Патрыярх Маскоўскі і ўсяе Русі Кірыл знаходзіцца з візітам у Брэсце. У дзень Сабора Беларускіх святых, які ў гэтым годзе адзначаецца 21 чэрвеня, найсвяцейшы ўладыка ўзначаліў Боскую літургію ў Свята-Уваскрасенскім саборы,
Свята-Уваскрасенскі сабор пабудаваны ў гонар 50-годдзя Перамогі ў Вялікай Айчыннай вайне. Ён з’яўляецца самым велічным храмам Брэсцкай епархіі, гісторыка-культурнай каштоўнасцю. Богаслужэнне патрыяршым чынам пачалося ў 10 гадзін. Да гэтага часу сабраліся шматлікія вернікі. Для зручнасці прыхаджан арганізавана прамая трансляцыя богаслужэння на вялікіх экранах. Таксама гледачы могуць убачыць яе на YouTube-канале Беларускага Экзархату, на тэлеканале «Беларусь 3». 
Патрыярху служыць мноства архірэяў Беларускай праваслаўнай царквы — Мітрапаліт Мінскі і Заслаўскі Веніямін, Патрыяршы Экзарх усяе Беларусі, архіепіскапы і епіскапы, а таксама архірэі Рускай праваслаўнай царквы, у тым ліку Мітрапаліт Рыгор Васкрасенскі, кіраўнік спраў Маскоўскай патрыярхіі. 
Ад свецкіх улад у святочным богаслужэнні прымаюць удзел намеснік прэм’ер-міністра Наталля Пяткевіч, старшыня Брэсцкага аблвыканкама Пётр Пархомчык, памочнік Прэзідэнта — інспектар па Брэсцкай вобласці Аляксандр Ломскі, упаўнаважаны па справах рэлігій і нацыянальнасцей Аляксандр Румак, іншыя афіцыйныя асобы.
Прыйсці сёння ў храм палічылі неабходным Валерыя Уласюк з сынам-падлеткам і пляменнікам. «Такое бывае вельмі рэдка. Патрыярх да нас прыязджаў у 2015 годзе, тады не атрымалася прыйсці. Вырашылі ў гэтым годзе не прапусціць. Наша сям’я веруючая, гэта вельмі важна для нас. Такое стаўленне да Бога мне прывілі бацькі, а я — свайму сыну», — падзялілася брастаўчанка.
Аксана Кацярыніч з Брэста расказала: «Для мяне сёння важная падзея, асаблівая ў жыцці царквы. Вера ў Бога займае асноўнае месца, гэта сэнс майго жыцця. Такое стаўленне мне прывілі маці і бабуля. Мы сёння прыйшлі ўсёй сям’ёй».
Святкаванне Сабора Беларускіх святых устаноўлена ў 1984 годзе па ініцыятыве Мітрапаліта Філарэта і прыпадае на трэцюю нядзелю па Пяцідзясятніцы. 
Патрыярх Кірыл ноччу 22 чэрвеня на тэрыторыі мемарыяльнага комплексу «Брэсцкая крэпасць-герой» прыме ўдзел у мітынгу-рэквіеме, прысвечаным Дню ўсенароднай памяці ахвяр Вялікай Айчыннай вайны і генацыду беларускага народа. Чакаецца, што Патрыярх Маскоўскі і ўсяе Русі адслужыць памінальную літыю па загінулых у гады вайны.
Фота Віталя Піваварчыка
