Каля 10 тыс. саджанцаў хвоі і елкі. Калектыў БЕЛТА дапамог аднавіць лес у Стаўбцоўскім раёне
Калектыў Беларускага тэлеграфнага агенцтва прыняў удзел у рэспубліканскай акцыі «Лес! Дабро! Парадак!». Удзельнікі мерапрыемства высадзілі маладыя дрэвы ў лесе Стаўбцоўскага раёна. Агульная справа аб’яднала супрацоўнікаў інфармацыйнага агенцтва і спецыялістаў Стаўбцоўскага лясгаса. Падрабязнасці сённяшняга мерапрыемства ў рэпартажы са Стаўбцоўскага раёна.
Перад высадкай дрэў калектыў БЕЛТА ў Стоўбцах усклаў кветкі да манумента Брацкай магілы воінаў Савецкай арміі і партызан, якія загінулі за Радзіму ў гады Вялікай Айчыннай вайны. Пасля гэтага працоўны дэсант перамясціўся ў лес, дзе работнікам розных падраздзяленняў інфармацыйнага агенцтва трэба было разам высадзіць маладыя дрэвы.
«Наш калектыў ужо другі год працуе ў Стаўбцоўскім раёне. Нягледзячы на тое што сёння рабочы дзень, на акцыю прыехала вялікая каманда, каля 50 чалавек. Мы пасадзілі амаль 10 тыс. саджанцаў на плошчы 2 га — сасну і елку. Мы прыедзем сюды яшчэ, кожны год БЕЛТА будзе саджаць лес», — адзначыла генеральны дырэктар БЕЛТА Ірына Акуловіч.
Падзяліўшыся па парах, работнікі высаджвалі маладыя дрэвы. Адзін з дапамогай спецыяльнага інструмента рабіў у зямлі лунку, у якую другі апускаў саджанцы. За некалькі гадзін запланаваны фронт работ быў выкананы.
«Сімвалічна, што калектыў БЕЛТА прыехаў садзіць лес менавіта 26 красавіка, у гадавіну трагедыі на Чарнобыльскай АЭС. Таму што лес — гэта лёгкія, гэта здароўе нашай планеты. Мы дакрануліся да гэтага здароўя, каб яно было адноўлена», — адзначыў намеснік генеральнага дырэктара БЕЛТА Дзмітрый Мазго.
Побач з вопытнымі журналістамі працавалі і маладыя спецыялісты. Арцём Апановіч менш за год працуе ў БЕЛТА. «Такія мерапрыемствы — выдатная магчымасць сустрэцца з калегамі ў нефармальнай абстаноўцы, лепш пазнаць адзін аднаго. Работа ў такіх умовах і з такой камандай — сапраўднае задавальненне», — падкрэсліў карэспандэнт.
Падзялілася ўражаннямі і начальнік аддзела рэкламы і маркетынгу БЕЛТА Марта Альхоўская: «Другі год я ўдзельнічаю ў такіх акцыях з БЕЛТА. Вельмі ганаруся тым, што з’яўляюся часткай вялізнай каманды, якая ўносіць уклад у аднаўленне лесу. Акрамя карысці для прыроды такія акцыі — унікальная магчымасць класна правесці час, паразмаўляць з калегамі». 
Пасля добра праведзенай работы калектыў БЕЛТА адправіўся ў мемарыяльную сядзібу Акінчыцы, у якой у 1882 годзе нарадзіўся вялікі беларускі класік Якуб Колас. На тэрыторыі сядзібы размяшчаюцца адноўлены дом, свіран, калодзеж і склеп. Сярод экспанатаў ёсць прадметы сялянскага побыту, у тым ліку аналагі тых, што не захаваліся да нашых дзён. 
Завяршыў сённяшнюю паездку ў Стаўбцоўскі раён абед у дружнай кампаніі на прыродзе.
БЕЛТА.
Фота Таццяны Матусевіч
