Якія законапраекты ў планах Савета Рэспублікі? Качанава падзялілася дэталямі
Наталля Качанава 9 красавіка, Мінск . Старшыня Савета Рэспублікі Наталля Качанава па выніках даклада кіраўніку дзяржавы расказала журналістам, якія законапраекты ёсць у планах вышэйшага заканадаўчага органа краіны,
«Савет Рэспублікі працуе ў адпаведнасці з дзеючым заканадаўствам і даручэннямі, якія дадзены кіраўніком дзяржавы. Перш за ўсё законы павінны ісці ад жыцця. Каб гэтыя законы былі актуальнымі і неабходнымі ў развіцці нашай краіны, мы павінны вельмі добра і інтэнсіўна працаваць», — сказала Наталля Качанава.
Паводле слоў старшыні Савета Рэспублікі, цяпер ідзе работа над планам заканатворчай дзейнасці. «Мы фарміруем планы работы на наступны год і, вядома, прадаўжаем актыўна працаваць над законапраектамі. Гэта толькі пачатак 2026 года, таму мы цяпер аналізуем прапановы, якія паступілі да нас. Мы гаварылі аб рабоце з насельніцтвам, і я хацела б адзначыць, што да нас з прапановамі звяртаецца вельмі шмат людзей. І гэтыя прапановы трэба ўрэгуляваць заканадаўча. Калі прымаюцца рашэнні на ўзроўні кіраўніка дзяржавы, яны абсалютна апраўданы, таму што аб гэтым гаварылі людзі», — адзначыла Наталля Качанава.
У якасці прыкладу яна прывяла другую бясплатную спробу ЭКА, якая была ўведзена ў Беларусі. Гэта ініцыятыва зыходзіла ад жанчын і ў выніку была падтрымана.
«Калі гаварыць канкрэтна аб тым, што нам трэба працаваць над тым або іншым законам… Вядома, перш за ўсё гэта будзе закон аб Усебеларускім народным сходзе, над якім мы ўжо цяпер пачалі працаваць. Калі мы ў гэтым годзе не вырашым гэта пытанне, то, магчыма, гэта будзе пераходны законапраект. У нас бывае такое, калі законапраект пераходзіць на наступны год, — сказала старшыня Савета Рэспублікі. — Мы разумеем, што даволі часта ўносяцца дапаўненні і змяненні ў Крымінальны кодэкс. Вельмі спадзяёмся, што не будзе пераходным Кодэкс аб ахове здароўя. Але, можа, да канца ён не будзе дапрацаваны ў гэтым годзе. Гэта кадыфікацыя ўсіх законаў, якія дзейнічаюць сёння ў нашай краіне і рэгулююць сферу аховы здароўя».
Наталля Качанава звярнула ўвагу на неабходнасць дэпутацкага корпуса краіны актыўна працаваць з людзьмі, выяўляць праблемныя пытанні і адлюстроўваць іх у нарматыўна-прававых актах Беларусі. «Мы сур’ёзна працуем над гэтымі пытаннямі, разумеючы, што ажыццяўляем яшчэ і каардынуючую ролю дэпутацкага корпуса ўсёй краіны. Мы рэгулярна праводзім сустрэчы з дэпутатамі ўсіх узроўняў, каб яны разумелі, якія пытанні вырашаюцца ў Савеце Рэспублікі. З другога боку, мы чэрпаем ад іх інфармацыю, якая цікавіць людзей на месцах», — падкрэсліла яна.
Адной з тэм даклада стала работа экспертнага савета пры Савеце Рэспублікі, які быў створаны па распараджэнні кіраўніка дзяржавы. Наталля Качанава назвала яго сур’ёзнай падмогай у рабоце вышэйшага заканадаўчага органа краіны. Да ўдзелу ў савеце запрашаюцца эксперты ў тых ці іншых сферах, якія прымаюць удзел у абмеркаванні законаў або іншых нарматыўна-прававых актаў.
