Гістарычная падзея для краіны. Чарнецкі аб прадстаўленні карціны Шагала ў Мінску
8 красавіка, Мінск . Выстава аднаго шэдэўра — карціны Марка Шагала «Прагулка» з калекцыі Дзяржаўнага Рускага музея (Санкт-Пецярбург) у Нацыянальным мастацкім музеі — гэта гістарычная падзея для нашай краіны і кожнага, хто любіць мастацтва. Такім меркаваннем з журналістамі падзяліўся міністр культуры Руслан Чарнецкі перад урачыстым адкрыццём выставы,
Карціну Марка Шагала «Прагулка» беларусы змогуць убачыць з 8 красавіка па 6 ліпеня. «Адна з самых знакавых і вядомых работ Марка Шагала, пра якую павінен ведаць кожны, упершыню экспануецца на радзіме. Гэта гістарычная падзея для нашай краіны і кожнага, хто любіць мастацтва», — сказаў Руслан Чарнецкі.
«Шагал — гэта наш зямляк, які пісаў пра Віцебшчыну. Вялікая падзяка Рускаму музею, што беларускі глядач убачыць такі шэдэўр сусветнай класікі мастацтва. Я ведаю, наколькі складана арганізаваць экспанаванне нават адной карціны такога найвышэйшага ўзроўню мастацкага выканання і значнасці для сусветнай культуры ў цэлым. Дзякуй усім, хто ўдзельнічаў у гэтай рабоце, гэта сапраўды вялікага каштуе», — дадаў ён, заклікаўшы ўсіх наведаць музей і абавязкова палюбавацца шэдэўрам сусветнага жывапісу.
Генеральны дырэктар Дзяржаўнага Рускага музея Ала Манілава падкрэсліла, што з 8 па 10 красавіка ў Нацыянальным мастацкім музеі пройдуць «Дні Рускага музея». Разам з выставай аднаго шэдэўра Марка Шагала гэта адна з ключавых падзей для музея ў 2026 годзе.
«Мы памятаем, што Шагал пакінуў вялікую спадчыну, і яна раскідана ў першую чаргу па Францыі і свеце. Калі гаварыць пра тое, што знаходзіцца ў Расіі, то, вядома, «Прагулка» — гэта цэнтральны твор Шагала, другая частка вядомага трыпціха. Першая частка трыпціха — «Двайны партрэт» — была падорана Францыі і знаходзіцца ў Цэнтры Пампіду, а трэцяя — «Над горадам» — у пастаянным зборы Траццякоўскай галерэі», — растлумачыла яна.
Паводле слоў Алы Манілавай, менавіта калекцыя Шагала, якая ў свой час паступіла ў Рускі музей, дала магчымасць установе сфарміраваць самы вялікі, поўны і дарагі збор рускага авангарду ў свеце.
«Не будзем забываць, што Шагал нарадзіўся пад Віцебскам, выхоўваўся тут, на вашай благаславёнай зямлі, першыя ўрокі браў у Віцебску, перш чым прыехаў у імперскую сталіцу і паехаў далей. У любых яго ўспамінах і імкненнях заўсёды падкрэсліваецца неймаверная, чароўная, рамантычная любоў да Віцебска, якую мастак пранёс праз усё сваё доўгае жыццё. Магчыма, менавіта Віцебск даваў Шагалу гэтыя неймаверныя сілы, якія падтрымлівалі яго прыродны геній. Ён пісаў Віцебск усюды. У «Прагулцы» мы бачым Віцебск, «Над горадам» — гэта таксама Віцебск», — дадала генеральны дырэктар Рускага музея.
«Калі ў 1970-х гадах Шагал прыехаў у Пецярбург упершыню за столькі дзесяцігоддзяў, то прыйшоў у Рускі музей, а музей, які ўпершыню практыкаваўся ў вядомым сёння ў Еўропе жанры, зрабіў для яго выставу аднаго шэдэўра. І ўжо ў гэтым стагоддзі мы паўтараем такую выставу не ў Пецярбургу, а тут, у Мінску», — заўважыла яна.
Генеральны дырэктар Нацыянальнага мастацкага музея Беларусі Ірына Мацяс падзякавала за падтрымку міністэрству культуры Беларусі і Расіі, а таксама супрацоўнікам Нацыянальнага мастацкага музея. «Вы цудоўная каманда, без вас гэтага не атрымалася б. І асобны дзякуй тым, хто ноччу сустракаў каштоўны груз. У нас сапраўды гэтыя тры месяцы будзе свята», — рэзюмавала Ірына Мацяс. 
Фота Таццяны Матусевіч
