Галоўчанка: у Беларусі няма абмежаванняў на прыём долараў старога ўзору
Фота з архіва 28 сакавіка, Мінск . У Беларусі няма абмежаванняў на прыём долараў старога ўзору. Аб гэтым заявіў журналістам старшыня праўлення Нацыянальнага банка Раман Галоўчанка,
«Магу з усёй адказнасцю заявіць, што ў палітыцы валютна-абменных аперацый з фізічнымі асобамі ніякіх абмежаванняў або змяненняў не ўводзілася, не ўводзіцца і ўводзіцца не будзе. У нас няма ніякіх інструкцый або абмежаванняў па прыёму тых ці іншых доларавых купюр, звязаных з іх годам выпуску. Цыркулююць і тыя, і другія. Банкі абавязаны прымаць і прымаюць купюры любога ўзору, калі яны з’яўляюцца плацежаздольнымі, інакш кажучы, маюць прыкметы плацежаздольнасці», — сказаў Раман Галоўчанка.
Усе банкі працуюць па правілах, прадугледжаных заключаным імі пад эгідай Асацыяцыі беларускіх банкаў пагадненнем аб выкарыстанні адзінага пераліку прыкмет плацежнасці банкнотаў у замежнай валюце, у рамках якога патрабаванні да прыёму долараў ЗША адзіныя. «Гэта пагадненне было накіравана на тое, каб не толькі ўніфікаваць патрабаванні, але і зрабіць іх больш «лайтовымі». Каб яны не былі залішнімі. Вядома, ёсць такі сегмент, як пашкоджаныя купюры, якія не валодаюць прыкметамі плацежаздольнасці. Раней гэтай праблемы наогул не было ў сувязі з тым, што банкі маглі праводзіць абмен такой валюты за мяжой на новыя купюры. Цяпер гэта па вядомых прычынах ускладнена. Тым не менш магу паведаміць, што Беларусбанк нядаўна адкрыў аперацыі па прыёме пашкоджаных купюр на інкаса, інакш кажучы, абмен на непашкоджаныя, але, зразумела, гэта паслуга платная і ёсць пэўная камісія», — адзначыў старшыня праўлення Нацбанка.
Калі няма дэфектаў і пашкоджанняў, то для банкаў няма розніцы паміж доларавымі купюрамі старога ўзору і новага, падкрэсліў ён. «Калі нейкія пытанні ўзнікаюць, яны часцей за ўсё звязаны з так званым чалавечым фактарам. Але Нацыянальны банк пільна сочыць за гэтай сітуацыяй, літаральна ў штодзённым рэжыме, дае адпаведныя ўстаноўкі банкам. Працуе кол-цэнтр, у які можна накіроўваць пытанні і магчымыя скаргі. Але ў цэлым праблема не мае сістэмнага характару», — заявіў Раман Галоўчанка.
Старшыня праўлення Нацбанка нагадаў, што яшчэ на пасадзе прэм’ер-міністра ён рэкамендаваў захоўваць зберажэнні ў нацыянальнай валюце. «Цяпер магу прывесці канкрэтныя лічбы, якія пацвярджаюць правільнасць маіх слоў. Калі год таму чалавек паклаў на дэпазіт Br1 тыс., цяпер ён зарабіў Br120. А той, хто купіў у той жа час долары ЗША і паклаў іх пад падушку, страціў Br20. Матэматыка зразумелая. Лічбы красамоўныя, гавораць самі за сябе», — рэзюмаваў ён.
