Галалёдзіца і да 11 градусаў марозу: чаго чакаць ад надвор’я ў Беларусі 8 лютага
Фота з архіва 7 лютага, Мінск . У Беларусі 8 лютага будзе воблачна, чакаецца снег і галалёдзіца. Аб гэтым расказалі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
На тэрыторыі Беларусі заўтра чакаецца пераважна воблачнае надвор’е. Уначы і раніцай часам будзе ісці снег, днём на поўдні чакаецца невялікі снег. Месцамі захаваецца галалёд, на асобных участках дарог — галалёдзіца. Вецер будзе паўночна-ўсходні, уначы слабы, днём умераны.
Тэмпература паветра ўначы будзе вар’іравацца ад мінус 4 градусаў у паўднёва-заходняй частцы да мінус 14 градусаў на поўначы краіны. Днём мароз аслабне, слупок тэрмометра будзе паказваць ад мінус 3 да мінус 9 градусаў. На поўначы рэспублікі прагназуецца да 11 градусаў марозу.
