Дзень афіцыйных перагавораў лідараў Беларусі і КНДР. Расказваем, што на парадку дня
26 сакавіка, Мінск . У Пхеньяне 26 сакавіка — дзень афіцыйных перагавораў Прэзідэнта Беларусі Аляксандра Лукашэнкі са Старшынёй Дзяржаўных спраў Карэйскай Народна-Дэмакратычнай Рэспублікі Кім Чэн Ынам, .
Кіраўнік беларускай дзяржавы напярэдадні прыбыў з афіцыйным двухдзённым візітам у КНДР, які праходзіць па запрашэнні лідара гэтай краіны.
Сімвалічна, што адразу пасля прыбыцця ў Пхеньян кіраўнік беларускай дзяржавы наведаў Кымсусанскі палац Сонца, дзе ўшанаваў памяць кіраўнікоў КНДР Кім Ір Сена і Кім Чэн Іра.
Адным з галоўных вынікаў сустрэчы на вышэйшым узроўні павінна стаць падпісанне дагавора аб дружбе і супрацоўніцтве паміж Беларуссю і КНДР, які сфарміруе аснову для далейшага пашырэння ўзаемадзеяння па канкрэтных напрамках. На перагаворах плануецца абмеркаваць увесь спектр напрамкаў развіцця адносін Беларусі і КНДР, вызначыць асноўныя сферы ўзаемнага інтарэсу і найбольш перспектыўныя для рэалізацыі праекты.
Візіт таксама прызначаны ўмацаваць дагаворна-прававую базу адносін. Чакаецца, што разам са згаданым дагаворам аб дружбе будзе заключана каля дзесяці двухбаковых дакументаў. У тым ліку па супрацоўніцтве ў сферах адукацыі, культуры, аховы здароўя, сельскай гаспадаркі і аграрных навук, інфармацыі і друку, фізічнай культуры і спорту, а таксама па лініі Беларускай гандлёва-прамысловай палаты і МЗС.
Напярэдадні ў Пхеньяне ў прысутнасці некалькіх тысяч чалавек адбылася маляўнічая цырымонія афіцыйнай сустрэчы лідараў дзвюх краін. Яна прайшла на галоўнай плошчы, якая мае імя Кім Ір Сена — заснавальніка КНДР. Аляксандр Лукашэнка і Кім Чэн Ын вельмі цёпла прывіталі адзін аднаго. Выкананне гімнаў Беларусі і КНДР, рота ганаровай варты, конніца, залпы гармат, матацыклетны эскорт прэзідэнцкага картэжу і іншы цырыманіял — усё падкрэслівала асаблівы статус візіту.
Пасля ўрачыстай цырымоніі на плошчы Аляксандр Лукашэнка ў Пхеньяне наведаў манумент «Вызваленне». Разам з беларускім лідарам тут прысутнічаў і Кім Чэн Ын. Прэзідэнт Беларусі ўсклаў вянок да падножжа манумента, ушанаваўшы памяць савецкіх воінаў, якія загінулі пры вызваленні Карэі ад японскіх захопнікаў. Акрамя таго, букет кветак быў ускладзены беларускім бокам да манумента па просьбе Прэзідэнта Расіі — у знак удзячнасці за дапамогу ў СВА.
Лідары дзвюх краін пасля завяршэння цырымоніі некаторы час размаўлялі адзін з адным з дапамогай перакладчыка, пасля чаго развіталіся да старту афіцыйных перагавораў.
Аляксандр Лукашэнка і Кім Чэн Ын ужо сустракаліся ў верасні 2025 года ў Пекіне, дзе прысутнічалі на парадзе ў ліку запрошаных замежных лідараў. Тады лідар КНДР запрасіў Прэзідэнта Беларусі наведаць яго краіну ў любы зручны час.
У снежні мінулага года ў інтэрв’ю тэлекампаніі «Ньюсмакс» кіраўнік беларускай дзяржавы падзяліўся ўражаннямі ад асабістых стасункаў са Старшынёй Дзяржаўных спраў КНДР: «Ён прыстойны, спакойны, сумленны чалавек. Гэта кароткая была сустрэча. Але ў мяне склалася такое ўражанне. Упэўнены, што маё ўражанне не падманлівае. З ім можна дамовіцца».
«Самы вялікі наш інтарэс у КНДР — умацаванне сапраўды дружалюбных, партнёрскіх адносін. Тут нашы сябры, яны нас чакаюць. Гэтак жа, як мы чакаем іх у сябе ў Беларусі. Надышоў час больш актыўна развіваць адносіны, — заявіў журналістам у Пхеньяне міністр замежных спраў Беларусі Максім Рыжанкоў. — Пакуль мы толькі ў пачатку шляху. Цяперашняя сітуацыя проста штурхае нас адзін да аднаго. Мы шукаем сяброў. Сябры няхай за край свету, але гэта вельмі адданыя, надзейныя і паважаючыя нас сябры».
Тавараабарот паміж краінамі пакуль сціплы, але ёсць шэраг цікавых пазіцый, па якіх можна ажыццяўляць пастаўкі. З беларускага боку гэта, напрыклад, фармацэўтычныя тавары і прадукты харчавання. А з КНДР могуць імпартавацца розныя касметычныя сродкі, якія славяцца сваёй якасцю і даступныя па цане. Ёсць і шэраг іншых перспектыўных напрамкаў.
Пры гэтым Беларусь заяўляла аб гатоўнасці разгледзець варыянты ўдзелу ў трохбаковых ініцыятывах, рэалізуючы тыя ці іншыя праекты не толькі непасрэдна з КНДР, але і ва ўзаемадзеянні з Расіяй або Кітаем. У гэтых краін на працягу шэрага дзесяцігоддзяў назапашаны багаж адносін з КНДР, чым можна было б скарыстацца ў агульных інтарэсах.
Узаемаадносіны Мінска і Пхеньяна ў цэлым маюць багатую гісторыю. Напрыклад, у 1984 годзе ў Беларусь прыязджаў Прэзідэнт КНДР Кім Ір Сен. Члены дэлегацыі ў сталіцы ўсклалі вянок да помніка-абеліска на плошчы Перамогі, наведалі трактарны завод і ВДНГ БССР. Высокі госць затым пабываў і ў гераічнай Брэсцкай крэпасці.
