На 6,3 тыс. мэтавых месцаў у ВНУ Беларусі пададзена каля 9,1 тыс. заяў — Мінадукацыі
Фота з архіва 7 ліпеня, Мінск . На 6,3 тыс. мэтавых месцаў у ВНУ пададзена каля 9,1 тыс. заяў абітурыентаў. Аб гэтым журналістам паведаміў першы намеснік міністра адукацыі Аляксандр Бахановіч,
У ВНУ Беларусі цяпер праходзяць унутраныя ўступныя іспыты для абітурыентаў, якія паступаюць на ўмовах мэтавай падрыхтоўкі. «План у гэтым годзе складае каля 6,3 тыс. мэтавых месцаў, на якія падалі дакументы каля 9,1 тыс. чалавек. Па выніках здачы ўступных іспытаў ВНУ залічаць мэтавікоў. Таксама 12 ліпеня пачнецца асноўны этап уступнай кампаніі — прыём дакументаў у абітурыентаў, якія паступаюць на агульных падставах», — расказаў Аляксандр Бахановіч.
Ён адзначыў, што цяпер эканомікай краіны запатрабаваны спецыяльнасці інжынернага, медыцынскага, педагагічнага і аграрнага профілю. «У цэлым усе спецыяльнасці нашых ВНУ запатрабаваны эканомікай краіны. Па любой спецыяльнасці, па якой малады чалавек атрымае вышэйшую адукацыю, ён атрымае і гарантаванае першае рабочае месца, а таксама ўсе бонусы, якія гарантуе наша дзяржава ўсім выпускнікам ВНУ», — падкрэсліў першы намеснік міністра.
Гаворачы аб прыёмнай кампаніі, Аляксандр Бахановіч праінфармаваў, што 21 рэгіянальная ВНУ ўжо залічыла ў рады першакурснікаў 367 пераможцаў універсітэцкіх алімпіяд. «Гэта вельмі моцныя абітурыенты. Сярэдні бал атэстата ў іх складае 9,1, а адзнака ў атэстаце па тым профільным прадмеце, па якім яны здавалі алімпіяду, — 9,4. Па гэтых параметрах можна зрабіць вывады, наколькі добра падрыхтаваны і высокаматываваны гэтыя абітурыенты», — дадаў ён.
