«Будучыня — час навукі». Лукашэнка ўручыў дыпломы доктара навук і атэстаты прафесара
22 студзеня, Мінск . Прэзідэнт Беларусі Аляксандр Лукашэнка ўручыў навуковым і навукова-педагагічным работнікам дыпломы доктара навук і атэстаты прафесара. Урачыстая цырымонія адбылася ў Палацы Незалежнасці,
«На нашых вачах набірае хуткасць новы этап лічбавай рэвалюцыі. Будучыня, аб якой яшчэ ўчора марылі самыя смелыя фантасты, надышла. І гэта будучыня — час навукі, без яе гарантаваць бяспеку, дабрабыт дзяржавы і свету ў цэлым немагчыма. Беларуская навука ва ўмовах глабальных выклікаў і нявызначанасці дэманструе ўстойлівасць і здольнасць да ўспрымання і пастаяннага развіцця інавацый, — сказаў Прэзідэнт. — Краіне патрэбны своечасовыя і эфектыўныя рашэнні. Калі сёння не будзе прарыўных навуковых адкрыццяў, заўтра ў нас не будзе ўнікальных тэхналогій». 
Дыпломы доктара навук кіраўнік дзяржавы ўручыў 12 вучоным.
Дацэнт, начальнік рэгіянальнага цэнтра тэсціравання Беларуска-Расійскага ўніверсітэта Аляксандр Даўгалёў удастоены вучонай ступені доктара тэхнічных навук за распрацоўку і стварэнне тэхналагічных асноў аддзелачна-ўмацавальнай апрацоўкі паверхняў вузлоў трэння сучасных машын і механізмаў, якія забяспечваюць павышэнне іх зносастойкасці ў 3,8-4,9 раза. Вынікі даследаванняў ужо ўкаранёны на прадпрыемствах, уключаючы Мінскі завод колавых цягачоў, Магілёўскі інструментальны завод і шэраг іншых.
Вучоная ступень доктара тэхнічных навук таксама прысуджана дацэнту кафедры таваразнаўства і экспертызы тавараў Беларускага дзяржаўнага эканамічнага ўніверсітэта Марыі Зяньковай за распрацоўку навуковых асноў тэхналогіі кансервавання прарошчанага зерня пшаніцы і грэчкі для стварэння новых прадуктаў павышанай харчовай каштоўнасці, што характарызуюцца функцыянальнай накіраванасцю і працяглым тэрмінам захоўвання. Атрыманыя вынікі вырашаюць праблему забеспячэння насельніцтва бяспечнымі прадуктамі павышанай харчовай каштоўнасці, а таксама сезоннасці ў рабоце прадпрыемстваў кансервавай прамысловасці. Адпаведныя падыходы ўжо ўкаранёны ў вытворчасць, напрыклад, на Быхаўскім кансервава-агароднінасушыльным заводзе.
Яшчэ адзін доктар тэхнічных навук — дацэнт, загадчык галіновай лабараторыі новых тэхналогій і матэрыялаў навукова-тэхнічнага цэнтра ААТ «Інтэграл» — кіруючая кампанія холдынга «Інтэграл» Яраслаў Салаўёў. Вучоная ступень яму прысуджана за распрацоўку мадэлі і новых метадаў фарміравання хуткай тэрмаапрацоўкай кантактна-бар’ерных структур вырабаў сілавой мікраэлектронікі з палепшанай энергаэфектыўнасцю ў пашыраным тэмпературным дыяпазоне эксплуатацыі. Вынікі даследаванняў укаранёны ў вытворчасць.
Дацэнт, прарэктар па навуковай рабоце Беларускага дзяржаўнага тэхналагічнага ўніверсітэта Вячаслаў Флейшэр таксама ўдастоены вучонай ступені доктара тэхнічных навук. Ён распрацаваў тэхналогію атрымання амідаў смаляных кіслот каніфолі і новых відаў біфункцыянальных прадуктаў на іх аснове. Укараненне гэтых навацый на айчынных прадпрыемствах дало магчымасць вырабляць шырокі асартымент высакаякасных відаў паперы і кардону з палепшанымі паказчыкамі трываласці і гідрафобнасці.
Дацэнту, загадчыку лабараторыі аўса Навукова-практычнага цэнтра Нацыянальнай акадэміі навук (НАН) Беларусі па земляробстве Антону Уласаву прысуджана вучоная ступень доктара сельскагаспадарчых навук за стварэнне сямі новых высокаўраджайных і адаптыўных сартоў аўса новага пакалення, а таксама за распрацоўку тэхналогіі вырошчвання айчынных сартоў аўса для рэалізацыі іх патэнцыялу ўраджайнасці ў змененых кліматычных умовах. Укараненне ўдасканаленай тэхналогіі і новых сартоў аўса на дзярнова-падзолістых глебах Беларусі забяспечвае павелічэнне ўраджайнасці збожжа на 1,1-11,6 ц/га.
Вольга Папко — дацэнт, дырэктар Цэнтра даследавання беларускай культуры, мовы і літаратуры НАН Беларусі — удастоена вучонай ступені доктара мастацтвазнаўства. Ступень прысуджана за раскрыццё значэння прыватных калекцый як мастацкага феномена, што адлюстроўвае характар гісторыка-культурнага кантэксту свайго часу і іх ролі ў развіцці мастацтва. Гэта дало магчымасць выявіць значэнне мастацкіх калекцый князёў Вітгенштэйнаў і іх арганічную сувязь з беларускім мастацтвам, зборам князёў Радзівілаў. Вынікі даследавання выкарыстоўваюцца ў замкавым комплексе «Мір», Гомельскім палацава-паркавым ансамблі, Нацыянальным гісторыка-культурным музеі-запаведніку «Нясвіж» і Нацыянальным гістарычным архіве Беларусі.
Дацэнту, дэкану факультэта эканомікі і бухгалтарскага ўліку Гродзенскага дзяржаўнага аграрнага ўніверсітэта Святлане Шчарбацюк прысуджана вучоная ступень доктара эканамічных навук за распрацоўку ўлікова-аналітычнай сістэмы для кіравання сельскагаспадарчымі арганізацыямі ў крызісных станах. Гэта сістэма дае магчымасць эфектыўна кантраляваць выкананне планаў фінансавага аздараўлення і выяўляць рызыкі пагаршэння фінансавага стану сельгасарганізацый.
Алена Мядзведская — дацэнт кафедры сацыяльнай работы Брэсцкага дзяржаўнага ўніверсітэта імя А.С. Пушкіна — удастоена вучонай ступені доктара псіхалагічных навук за вызначэнне праяў дэфармацыі вышэйшых псіхалагічных пазнавальных функцый (увагі, памяці, мыслення, мовы) у інтэрнэт-карыстальнікаў ва ўзросце 40-65 гадоў і распрацоўку мадэлі дэфармуючага інтэрнэт-уплыву, што тлумачыць іх з’яўленне праз рэалізацыю стратэгіі паводзін «адмаўленне ад намаганняў».
Вучоная ступень доктара медыцынскіх навук прысуджана дацэнту кафедры афтальмалогіі інстытута павышэння кваліфікацыі і перападрыхтоўкі кадраў аховы здароўя Беларускага дзяржаўнага медыцынскага ўніверсітэта (БДМУ) Аксане Дудзіч за распрацоўку і ўкараненне ў клінічную практыку персаніфікаванай сістэмы лячэння пацыентаў з траўматычнымі дэфектамі і дэфармацыямі вачніцы на аснове камп’ютарнага мадэлявання. Гэта забяспечвае эфектыўнае аднаўленне эстэтыкі твару, скарачае час аперацыі ў 1,8 раза і садзейнічае практычна поўнаму аднаўленню зрокавых функцый у пацыентаў.
Яшчэ адзін доктар медыцынскіх навук — дацэнт кафедры прамянёвай дыягностыкі інстытута павышэння кваліфікацыі і перападрыхтоўкі кадраў аховы здароўя БДМУ Алена Жук. Вучоная ступень прысуджана ёй за ўкараненне ў клінічную практыку аптымальных алгарытмаў прамянёвай дыягностыкі злаякасных новаўтварэнняў шыйкі і цела маткі. Распрацаваныя метады павялічваюць дыягнастычную эфектыўнасць абследавання і змяншаюць прамянёвую нагрузку на пацыента.
Вучоная ступень доктара медыцынскіх навук прысуджана дацэнту 1-й кафедры дзіцячых хвароб БДМУ Вераніцы Прылуцкай за распрацоўку і ўкараненне тэхналогіі медыцынскай прафілактыкі парушэнняў росту і развіцця ў буйнаважкіх і малаважкіх пры нараджэнні дзяцей.
Дацэнт, навуковы кіраўнік галіновай лабараторыі навукова-дыягнастычных даследаванняў Рэспубліканскага навукова-практычнага цэнтра радыяцыйнай медыцыны і экалогіі чалавека Юлія Ярэц удастоена вучонай ступені доктара медыцынскіх навук за распрацоўку і ўкараненне ў практычную ахову здароўя новай эфектыўнай комплекснай сістэмы дыягностыкі і прагназавання інфекцыі ран і апёкаў.
Атэстаты прафесара Прэзідэнт уручыў загадчыку кафедры кіно і тэлебачання Беларускай дзяржаўнай акадэміі мастацтваў Віктару Васільеву (мастацтва); доктару тэхнічных навук, загадчыку кафедры інфармацыйна-вымяральных сістэм Беларускага дзяржаўнага ўніверсітэта інфарматыкі і радыёэлектронікі, Аляксандру Гусінскаму (прыборабудаванне і метралогія); доктару юрыдычных навук, прафесару кафедры дзяржаўнага кіравання Беларускага дзяржаўнага ўніверсітэта Вользе Талочка (права); доктару фізіка-матэматычных навук, галоўнаму навуковаму супрацоўніку Інстытута фізікі імя Б.І. Сцяпанава НАН Беларусі Алегу Траціннікаву (фізіка); доктару медыцынскіх навук, вядучаму хірургу медыцынскай часткі дзяржустановы «432-і ордэна Чырвонай Зоркі галоўны ваенны клінічны медыцынскі цэнтр Узброеных Сіл Рэспублікі Беларусь» Аляксею Трухану (медыцына); доктару медыцынскіх навук, загадчыку кафедры отарыналарынгалогіі з курсамі афтальмалогіі і стаматалогіі Гомельскага дзяржаўнага медыцынскага ўніверсітэта Ірыне Шлязе (медыцына).
