Без бар’ераў у гандлі. З чым звязаны курс у ЕАЭС на выкарыстанне ДАСТ, расказала Маргунова
Фота gosstandart.gov.by 20 чэрвеня, Мінск . Якія задачы ў галіне тэхнічнага рэгулявання і стандартызацыі ставіць перад партнёрамі Беларусь як старшыня ў 2025 годзе з органах ЕАЭС, у інтэрв’ю ўдакладніла кіраўнік Дзяржаўнага камітэта па стандартызацыі Алена Маргунова.
З моманту зацвярджэння першых рэгламентаў саюза прайшло больш за 10 гадоў, таму сёння востра стаіць пытанне аб неабходнасці ацэнкі іх навукова-тэхнічнага ўзроўню. Яна будзе праводзіцца, як было заўважана, не радзей за адзін раз у пяць гадоў. План ужо зацверджаны і прадугледжвае ацэнку 29 дзеючых рэгламентаў. З іх 5 замацаваны за Беларуссю: на трактары, нізкавольтнае абсталяванне, электрамагнітную сумяшчальнасць, наяўнасць небяспечных рэчываў у электратэхніцы і маркіроўку харчовай прадукцыі.
«Важна разумець, што галоўным інструментам у рэалізацыі абавязковых патрабаванняў тэхрэгламентаў ЕАЭС выступае стандартызацыя, — звярнула ўвагу кіраўнік камітэта. — Работы па яе сістэмным развіцці замацаваны ў Стратэгіі развіцця еўразійскай эканамічнай інтэграцыі да 2025 года. Краіны саюза ўзялі курс на выкарыстанне міждзяржаўных стандартаў (ДАСТ). Стандарты такога статусу прымяняюцца і ў СНД, што садзейнічае безбар’ернаму гандлю з дзяржавамі Садружнасці, якія не ўваходзяць у еўразійскую пяцёрку».
Сёння можна адназначна гаварыць, што стварэнне ЕАЭС надало новы імпульс міждзяржаўнай стандартызацыі ў СНД. На гэта ўказваюць лічбы: калі да 2010 года на прасторы СНД у год прымалася каля 300 ДАСТ, то з 2011 па 2024 год — звыш 800.
Для выканання тэхнічных рэгламентаў ЕАЭС прымяняецца больш за 5880 ДАСТ. На бліжэйшы час, паводле слоў кіраўніка Дзяржстандарту, трэба стварыць больш як 2 тыс. ДАСТ, і ў гэтай рабоце краінам важна каардынаваць намаганні, каб фонд стандартаў быў сучасным, дакументы з’яўляліся своечасова, а інфраструктура іх распрацоўкі ўлічвала лічбавыя фарматы.
«Па нашай ініцыятыве на пасяджэнні Савета кіраўнікоў па стандартызацыі, які пройдзе на IV Еўразійскім эканамічным форуме ў Мінску, будзе разгледжана пытанне аб вызначэнні прыярытэтных напрамкаў работ па стандартызацыі ў ЕАЭС. Уключэнне, напрыклад, такіх напрамкаў, як нізкавугляродны парадак дня і арганічная прадукцыя і вытворчасць, якія цяпер актуальны для еўразійскай пяцёркі, павінна мець падтрымку стандартамі, — упэўнена Алена Маргунова. — Безумоўна, пры распрацоўцы тэхнічных рэгламентаў і міждзяржаўных стандартаў, як і змяненняў у іх, узнікаюць спрэчкі. Але ўсе гэтыя моманты абмяркоўваюцца на нарадах рознага ўзроўню, і, як вынік, дасягаецца рашэнне, якое задавальняе ўсіх».
