Больш за 120 суб’ектаў гаспадарання з Масквы і Маскоўскай вобласці акрэдытаваліся на БУТБ з пачатку года
Фота з архіва 25 верасня, Мінск . Беларуская ўніверсальная таварная біржа (БУТБ) будзе супрацоўнічаць з АНА «Маспрам» па развіцці біржавога гандлю з Масквой і Маскоўскай вобласцю. Аб гэтым паведамілі ў прэс-службе БУТБ.
У студзені — жніўні 2026 года на Маскву і Маскоўскую вобласць прыпала 29% усёй сумы біржавых здзелак расійскіх кампаній на БУТБ. У асноўным гэта былі закупкі прадукцыі, што выпускаецца айчыннымі прадпрыемствамі аграпрамысловага комплексу. У прыватнасці, павышаным попытам у маскоўскіх удзельнікаў таргоў карысталіся беларускія мясапрадукты, сметанковае масла і сухое малако. Такой інфармацыяй падзяліўся намеснік начальніка ўпраўлення знешнеэканамічнай дзейнасці БУТБ Герман Пузырны ў час выступлення на вэбінары для маскоўскіх кампаній, якія працуюць у сферы прамысловасці і сельскай гаспадаркі. Мерапрыемства было арганізавана АНА «Маспрам» у ходзе падрыхтоўкі да міжнароднай бізнес-місіі ў Беларусь для экспартна арыентаваных суб’ектаў прамысловага і аграпрамысловага сектараў Масквы.
«Асабліва актыўна ў гэтым годзе маскоўскія кампаніі купляюць мясапрадукцыю і сухое малако. У параўнанні са студзенем — жніўнем мінулага года біржавыя продажы гэтых дзвюх таварных груп выраслі на 8% і 16% адпаведна. Што датычыцца імпарту з Масквы і Маскоўскай вобласці, то найбольшую долю ў структуры здзелак займаюць вырабы з чорных металаў, запчасткі і камплектуючыя для абсталявання, змазачныя матэрыялы і палімеры. З новых пазіцый, якія выстаўляюцца на таргі маскоўскімі ўдзельнікамі, можна адзначыць свініну і свіныя субпрадукты, пастаўкі якіх пачаліся ў чэрвені гэтага года. За няпоўныя тры месяцы ўжо рэалізавана каля 200 т такой прадукцыі ў адрас беларускіх мясаперапрацоўчых прадпрыемстваў», — расказаў Герман Пузырны.
З мэтай пашырэння пула таваравытворцаў з Масквы на беларускай біржавой пляцоўцы плануецца наладзіць больш цеснае ўзаемадзеянне паміж БУТБ і АНА «Маспрам» у частцы інфармавання маскоўскага бізнесу аб магчымасцях выкарыстання біржавога канала збыту. Аб’яднанне лічбавай інфраструктуры БУТБ з шырокай сеткай кантактаў «Маспрама» будзе садзейнічаць росту тавараабароту маскоўскіх кампаній на біржавых таргах у Беларусі, а таксама дасць магчымасць аптымізаваць ланцужкі паставак тавараў у абодвух напрамках.
З пачатку года на БУТБ акрэдытаваліся 123 новыя суб’екты гаспадарання з Масквы і Маскоўскай вобласці, а агульная колькасць маскоўскіх кліентаў біржы на сённяшні дзень налічвае 1652.
ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных біржаў ва Усходняй Еўропе. Яе галоўная функцыя — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
