Беларусь і Кітай пацвердзілі няўхільнае выкананне ўсіх дамоўленасцей лідараў дзвюх краін
Фота з архіва 27 лютага, Мінск . Міністр замежных спраў Беларусі Максім Рыжанкоў 27 лютага сустрэўся з Надзвычайным і Паўнамоцным Паслом КНР у Беларусі Чжан Вэньчуанем. Аб гэтым паведамілі ў беларускім знешнепалітычным ведамстве.
Субяседнікі абмяняліся меркаваннямі па актуальных пытаннях двухбаковага і міжнароднага парадку дня. Яны таксама абмеркавалі графік маючых адбыцца ў 2026 годзе кантактаў кіраўніцтва дзвюх краін. 
Міністр замежных спраў Беларусі і пасол Кітая асаблівую ўвагу ўдзялілі пытанням узаемадзеяння па лініі міжнародных арганізацый у рэалізацыі ініцыятыў, якія накіраваны на ўмацаванне стабільнасці, аднаўленне міру і бяспекі, а таксама забяспечваюць неабходныя ўмовы для супрацоўніцтва ў адпаведнасці з духам і літарай Статута ААН.
Максім Рыжанкоў зноў пацвердзіў прыхільнасць Беларусі да прынцыпу «аднаго Кітая», падтрымку намаганняў кітайскага ўрада ў пытанні абароны нацыянальнага суверэнітэту і тэрытарыяльнай цэласнасці.
Бакі падкрэслілі гатоўнасць да няўхільнага выканання ўсіх дамоўленасцей кіраўнікоў Беларусі і Кітая па ўмацаванні палітычнага ўзаемадзеяння, пашырэнні гандлёва-эканамічнага і інвестыцыйнага супрацоўніцтва, развіцці прамысловай і тэхналагічнай кааперацыі.
Фота МЗС Беларусі
